അമേരിക്കയുടെ പ്രതിരോധ സെക്രട്ടറിയെ ഒരു സാധാരണ സൈനികൻ പരസ്യമായി ശാസിക്കുന്നു! അതും രാജ്യത്തിനുവേണ്ടി ജീവൻ ബലിയർപ്പിച്ച സൈനികരുടെ പുണ്യസ്മാരകത്തിന് മുന്നിൽവെച്ച്. ലോകത്തിലെ ഏറ്റവും ശക്തമായ സൈനിക സംവിധാനങ്ങളിലൊന്നിന്റെ തലപ്പത്തിരിക്കുന്ന വ്യക്തിയോട് ഇത്തരത്തിൽ പെരുമാറിയാൽ ആ സൈനികന്റെ ഭാവി എന്തായിരിക്കും? ശിക്ഷയോ, സസ്പെൻഷനോ, അതോ ജോലി തന്നെ നഷ്ടപ്പെടുമോ ? എന്നാൽ അമേരിക്കയിൽ സംഭവിച്ചത് ആരെയും അമ്പരപ്പിക്കുന്ന കാര്യമാണ്. തന്നെ ശാസിച്ച സൈനികനെ വിളിച്ചുവരുത്തി പ്രതിരോധ സെക്രട്ടറി പീറ്റ് ഹെഗ്‌സെത്ത് സ്വന്തം കൈകൊണ്ട് മെഡൽ അണിയിച്ചു ! അധികാരത്തിന്റെ മുന്നിൽ തലകുനിക്കാതെ കടമ നിർവഹിച്ച സൈനികനും ആ കടമബോധത്തെ അംഗീകരിച്ച ഭരണാധികാരിയും ഇപ്പോൾ ലോകശ്രദ്ധ നേടുകയാണ്. ദേശീയ മാധ്യമമായ ന്യൂസ് 18 റിപ്പോർട്ട് ചെയ്ത ഈ സംഭവം സൈനിക അച്ചടക്കത്തിന്റെയും അധികാരത്തോടുള്ള ഉത്തരവാദിത്തത്തിന്റെയും വ്യത്യസ്തമായൊരു കഥയാണ് പറയുന്നത്.

അമേരിക്കയിലെ ആർലിംഗ്ടൺ ദേശീയ സെമിത്തേരിയിലാണ് സംഭവം നടന്നത്. ഒന്നാം ലോകമഹായുദ്ധത്തിലും രണ്ടാം ലോകമഹായുദ്ധത്തിലും കൊറിയൻ യുദ്ധത്തിലും ജീവൻ ബലിയർപ്പിച്ച അജ്ഞാത സൈനികരുടെ ഓർമകൾ നിലനിൽക്കുന്ന പുണ്യസ്മാരകമാണ് ഇവിടെയുള്ള അജ്ഞാത സൈനികന്റെ ശവകുടീരം. രാജ്യത്തിനുവേണ്ടി ജീവൻ നൽകിയ സൈനികരോടുള്ള ആദരസൂചകമായി ഇവിടെ കർശനമായ നിശ്ശബ്ദതയും അച്ചടക്കവും പാലിക്കേണ്ടതുണ്ട്.

അമേരിക്കൻ പ്രസിഡന്റ് ഡോണൾഡ്‌ ട്രംപിനൊപ്പം വെറ്ററൻസ് ഡേയുടെ ഭാഗമായി നടന്ന പുഷ്പചക്ര സമർപ്പണ ചടങ്ങിൽ പങ്കെടുത്തശേഷമാണ് പ്രതിരോധ സെക്രട്ടറി പീറ്റ് ഹെഗ്‌സെത്തും സംഘവും ആർലിംഗ്ടൺ ദേശീയ സെമിത്തേരിയിലെ അജ്ഞാത സൈനികന്റെ ശവകുടീരത്തിന് സമീപമെത്തിയത്. രാജ്യത്തിനുവേണ്ടി യുദ്ധഭൂമിയിൽ ജീവൻ ബലിയർപ്പിച്ച സൈനികരുടെ ഓർമകൾ ഉറങ്ങുന്ന പുണ്യഭൂമി. അവിടെ ഓരോ നിമിഷവും പാലിക്കേണ്ടത് നിശ്ശബ്ദതയും ആദരവുമാണ്. ഹെഗ്‌സെത്തിനെ കൂടാതെ ഭാര്യ ജെന്നിഫർ ഹെഗ്‌സെത്തും ഉന്നത ഉപദേഷ്ടാക്കളായ റിക്കി ബുറിയ, ടാമി റഡാബോ, പാട്രിക് വീവർ എന്നിവരും സംഘത്തിലുണ്ടായിരുന്നു.

സ്മാരകത്തിന് സമീപം ചിത്രങ്ങളെടുത്തും പരസ്പരം സംസാരിച്ചും സംഘം സമയം ചെലവഴിക്കുകയായിരുന്നു. ഇതിനിടെയാണ് സംഘത്തിലെ ഒരാളുടെ ചിരി ആ നിശ്ശബ്ദതയെ ഭേദിച്ചത്. എന്നാൽ ആ ചിരി കേട്ട് അവിടെ കാവൽനിന്നിരുന്ന സൈനികൻ വെറുതെയിരുന്നില്ല. അജ്ഞാത സൈനികന്റെ ശവകുടീരത്തിന് കാവൽനിൽക്കുന്ന സ്പെഷ്യലിസ്റ്റ് തോമസ് ഇഗ്ലേഷ്യസ് ഉടൻ തന്നെ സംഘത്തിനുനേരെ തിരിഞ്ഞു. മുന്നിൽ നിൽക്കുന്നത് അമേരിക്കയുടെ പ്രതിരോധ സെക്രട്ടറിയാണെന്നതോ അദ്ദേഹത്തിനൊപ്പം ഉന്നത ഉദ്യോഗസ്ഥരുണ്ടെന്നതോ ആ സൈനികനെ തന്റെ കടമയിൽനിന്ന് പിന്തിരിപ്പിച്ചില്ല.

അടുത്ത നിമിഷം അവിടെ മുഴങ്ങിയത് സൈനികന്റെ കർശനമായ ശബ്ദമായിരുന്നു. ‘എല്ലാ സന്ദർശകരും എല്ലായ്പ്പോഴും നിശ്ശബ്ദതയുടെയും ആദരവിന്റെയും അന്തരീക്ഷം നിലനിർത്തണം!’ രാജ്യത്തിന്റെ പ്രതിരോധ സെക്രട്ടറിയും സംഘവും കേൾക്കെയാണ് അദ്ദേഹം ഈ മുന്നറിയിപ്പ് നൽകിയത്. അധികാരത്തിന്റെ ഉയരമോ പദവിയുടെ വലുപ്പമോ നോക്കാതെ സ്മാരകത്തിന്റെ അന്തസ്സും അച്ചടക്കവും സംരക്ഷിക്കുകയായിരുന്നു ആ സൈനികൻ.

സംഭവത്തിന്റെ ദൃശ്യങ്ങൾ പുറത്തുവന്നതോടെ വിഷയം വലിയ ശ്രദ്ധ നേടി. ലോകത്തിലെ ഏറ്റവും ശക്തമായ സൈനിക സംവിധാനങ്ങളിലൊന്നിന്റെ തലപ്പത്തിരിക്കുന്ന വ്യക്തിയുടെ സംഘത്തെ ഒരു സാധാരണ സൈനികൻ പരസ്യമായി ശാസിച്ചിരിക്കുന്നു ! ഇതിന് പിന്നാലെ എന്ത് സംഭവിക്കുമെന്നതായിരുന്നു ഉയർന്ന ചോദ്യം. സൈനികനെതിരെ നടപടിയുണ്ടാകുമോ? മേലധികാരികളുടെ അതൃപ്തിക്ക് ഇരയാകുമോ? എന്നാൽ പിന്നീട് നടന്നത് ആ ചോദ്യങ്ങൾക്കെല്ലാം അപ്രതീക്ഷിതമായ മറുപടിയായിരുന്നു. എന്നാൽ തൊട്ടടുത്ത ദിവസം സംഭവിച്ചത് എല്ലാവരെയും അത്ഭുതപ്പെടുത്തി. തന്നെ ഉൾപ്പെടുന്ന സംഘത്തെ പരസ്യമായി ശാസിച്ച സൈനികനെ ശിക്ഷിക്കുന്നതിനുപകരം പീറ്റ് ഹെഗ്‌സെത്ത് അദ്ദേഹത്തെ ആദരിക്കാൻ തീരുമാനിച്ചു. തോമസ് ഇഗ്ലേഷ്യസിന് ജോയിന്റ് സർവീസ് കമ്മൻഡേഷൻ മെഡൽ സമ്മാനിച്ചാണ് പ്രതിരോധ സെക്രട്ടറി തന്റെ അഭിനന്ദനം അറിയിച്ചത്. സൈനികരെയും അവർ ഉയർത്തിപ്പിടിക്കുന്ന നിലവാരങ്ങളെയും തങ്ങൾ സ്നേഹിക്കുന്നുവെന്നും ഇഗ്ലേഷ്യസ് മികച്ച രീതിയിൽ കടമ നിർവഹിച്ചുവെന്നും ഹെഗ്‌സെത്ത് എക്സിൽ കുറിച്ചു.

ഈ സംഭവത്തിന് മറ്റൊരു ചരിത്രപ്രാധാന്യം കൂടിയുണ്ട്. അമേരിക്കൻ സൈന്യത്തിലെ ‘ദി ഓൾഡ് ഗാർഡ്’ എന്നറിയപ്പെടുന്ന മൂന്നാം ഇൻഫൻട്രി റെജിമെന്റിലെ സൈനികരാണ് അജ്ഞാത സൈനികന്റെ ശവകുടീരത്തിന് ഇരുപത്തിനാല് മണിക്കൂറും കാവൽനിൽക്കുന്നത്. മഴയിലും മഞ്ഞിലും കൊടും തണുപ്പിലും അവർ തങ്ങളുടെ ഉത്തരവാദിത്തം നിർവഹിക്കുന്നു. രാജ്യത്തിനുവേണ്ടി ജീവൻ ബലിയർപ്പിച്ചവരുടെ സ്മരണ സംരക്ഷിക്കുന്ന ഈ ദൗത്യം അമേരിക്കൻ സൈന്യത്തിലെ ഏറ്റവും അഭിമാനകരമായ ചുമതലകളിലൊന്നാണ്.

ഈ സംഭവത്തിൽ ഏറ്റവും ശ്രദ്ധേയമായത് രണ്ട് വ്യക്തികളുടെ നിലപാടുകളാണ്. അധികാരത്തിന്റെ മുന്നിൽ പതറാതെ കടമ നിർവഹിച്ച സൈനികനും സ്വന്തം സംഘത്തെ ശാസിച്ച സൈനികന്റെ നടപടിയെ അംഗീകരിച്ച പ്രതിരോധ സെക്രട്ടറിയും. നിയമങ്ങൾ സാധാരണക്കാർക്ക് മാത്രമല്ല, അധികാരസ്ഥാനത്തിരിക്കുന്നവർക്കും ബാധകമാണെന്ന വലിയ സന്ദേശമാണ് ഈ സംഭവം നൽകുന്നത്. രാജ്യത്തിനുവേണ്ടി ജീവൻ ബലിയർപ്പിച്ച സൈനികരുടെ ഓർമകൾക്ക് മുന്നിൽ പദവികൾക്കോ അധികാരത്തിനോ പ്രത്യേക പരിഗണനയില്ല. അവിടെ ഏറ്റവും വലുത് ആദരവും അച്ചടക്കവുമാണ്. അധികാരത്തെക്കാൾ കടമയെ ഉയർത്തിപ്പിടിച്ച തോമസ് ഇഗ്ലേഷ്യസിന്റെ നിലപാടും ആ കടമബോധത്തെ അംഗീകരിച്ച പീറ്റ് ഹെഗ്‌സെത്തിന്റെ നടപടിയും ലോകത്തിന് മുന്നിൽ ശ്രദ്ധേയമായൊരു മാതൃകയാണ്. കാരണം, ഒരു രാജ്യത്തിന്റെ യഥാർത്ഥ ശക്തി അതിന്റെ ആയുധങ്ങളിൽ മാത്രമല്ല, സൈനികർ ഉയർത്തിപ്പിടിക്കുന്ന മൂല്യങ്ങളിലും അവയെ ആദരിക്കുന്ന നേതൃത്വത്തിലുമാണ്.